ಪ್ರತಿಭಟನೆ ನಂತರ ಪತ್ರಕರ್ತರ ಬೇಡಿಕೆಗೆ ಪಾಲಿಕೆಯಿಂದ ಪರಿಹಾರ

ಅಸ್ಮಿತೆ ವರದಿ, ಅ.೧೯: ಬೆಳಗಾವಿ ಪತ್ರಕರ್ತರ ಕಲ್ಯಾಣ ನಿಧಿಗೆ ಅನುದಾನ ಬಿಡುಗಡೆ ಹಾಗೂ ವಾರ್ಷಿಕ ಆರೋಗ್ಯ ಕಾರ್ಡ್ ಒದಗಿಸುವ ಕುರಿತು ಕಳೆದ ಎರಡ್ಮೂರು ತಿಂಗಳುಗಳಿಂದ ಪರಸ್ಪರ ಎಳದಾಟದಲ್ಲಿ ಆಗುತ್ತಿರುವ ವಿಳಂಬವನ್ನು ವಿರೋಧಿಸಿ ಪತ್ರಕರ್ತರು ಬೆಳಗಾವಿ ಮಹಾನಗರ ಪಾಲಿಕೆ ಕಚೇರಿ ಎದುರು ಇಂದು ಪ್ರತಿಭಟನೆ ನಡೆಸಬೇಕಾದ ಸನ್ನಿವೇಶ ನಿರ್ಮಾಣವಾಯಿತು. ಸಚಿವರ, ಶಾಸಕ ಮಧ್ಯ ಪ್ರವೇಶದಿಂದ ಪತ್ರಕರ್ತ ಬೇಡಿಕೆಯನ್ನು ಶೀಘ್ರದಲ್ಲೇ ಬಗೆಹರಿಸಲು ಪಾಲಿಕೆ ಒಪ್ಪಿಗೆ ಸೂಚಿಸಿದೆ.

ಬಿಡುವಿಲ್ಲದೆ ಶ್ರಮಿಸುವ ಪತ್ರಕರ್ತರ ಆರೋಗ್ಯದ ಹಿತದ ದೃಷ್ಟಿಯಿಂದ ಬೆಳಗಾವಿ ಮಹಾನಗರ ಪಾಲಿಕೆ ಪತ್ರಕರ್ತ ಕಲ್ಯಾಣ ನಿಧಿ ನಿಗದಿಗೊಳಿಸಿ  ಕಳೆದ ಮೂರ್ನಾಲ್ಕು ವರ್ಷಗಳಿಂದ ವಾರ್ಷಿಕ ಆರೋಗ್ಯ ಕಾರ್ಡ್ ಒದಗಿಸುತ್ತ ಬಂದಿದೆ. ಪ್ರಸಕ್ತ ವರ್ಷ ಕಾರ್ಡ್ ಕಾಲಾವಧಿ ಮುಗಿದು ಮೂರು ತಿಂಗಳು ಕಳೆದರೂ ಕಾರ್ಡ ಒದಗಿಸಿರಲಿಲ್ಲ. ಅನೇಕಸಲ ಪತ್ರಕರ್ತರು ಪಾಲಿಕೆಗೆ ಮನವರಿಕೆ ಮಾಡಿಕೊಂಡಿದ್ದರೂ ಪತ್ರಕರ್ತರ ಪ್ರಾದೇಶಿಕ ವ್ಯಾಪ್ತಿ ನಕ್ಷೆಯ ತಾಂತ್ರಿಕ ‌ಕಾರಣದಿಂದಾಗಿ  ತಡೆ ಹಿಡಿಯಲಾಗಿತ್ತು.

ಪಾಲಿಕೆಯ ವಿಳಂಭತೆಯನ್ನು ವಿರೋಧಿಸಿ ಪಾಲಿಕೆ ಕಚೇರಿ ಎದುರು ಇಂದು  ಪತ್ರಕರ್ತರ ಸಂಘದ ಪದಾಧಿಕಾರಿಗಳು, ವಿವಿಧ ಮಾಧ್ಯಮ ಸಂಸ್ಥೆಗಳ ಪತ್ರಕರ್ತರು ಪ್ರತಿಭಟನೆಗೆ ಇಳಿದಾಗ ಜಿಲ್ಲಾ ಉಸ್ತುವಾರಿ ಸಚಿವ ಸತೀಶ್ ಜಾರಕಿಹೊಳಿ, ಶಾಸಕ ರಾಜು ಸೇಠ ಅವರು ಆಯುಕ್ತರಿಗೆ ದೂರವಾಣಿ ಮೂಲಕ ಸಂಪರ್ಕಿಸಿ   ಸಮಸ್ಯೆ ಬಗೆಹರಿಸಲು ಸೂಚಿಸಿದರು.

ಶಾಸಕ ಅಭಯ ಪಾಟೀಲ ನೇರವಾಗಿ ಪತ್ರಕರ್ತರ ಪ್ರತಿಭಟನಾ ಸ್ಥಳಕ್ಕೆ ಆಗಮಿಸಿ, ಪಾಲಿಕೆ‌ ಮಹಾಪೌರ, ಉಪ ಮಹಾಪೌರ, ಆಯುಕ್ತರು ಹಾಗೂ ಪತ್ರಕರ್ತರೊಂದಿಗೆ  ಸಮಾಲೋಚಿಸಿ  ಪರಿಹಾರ ಸೂತ್ರಕಂಡುಕೊಂಡು  ಸಮಸ್ಯೆಯ ಇತಿಶ್ರೀಗೆ ಕಾರಣರಾದರು.

ಅತೀ ಶೀಘ್ರದಲ್ಲಿ ಆರೋಗ್ಯ ಕಾರ್ಡ್ ವಿತರಿಸುವುದಾಗಿ ಪಾಲಿಕೆಯಿಂದ ಭರವಸೆ ನೀಡಲಾಗಿದೆ.

**